مين اللي قال ؟؟
شعر : ماجد كمال أبادير
مين اللي قال ان البلد عايزة ولد ؟؟؟؟؟؟
طاب يبقوا مين الملمومين حوالين بلدهم ف الميدان ؟؟؟
وف كل شارع ف البلد ؟؟
ومهملين حالهم ومالهم
مزروعين ...
سايبين عيالهم ..
كانخيل اتصب طوله للسما !!
أنا عقلي طاااااااار
أنا عقلي طار...!!!
اكتب مواعظ .. او حكم
يطلع هزار!!!!!!!
مين كان يصدق ..؟
ان مصر ف يوم كدة ترجع شباب ...
والكون يشوفها .. ف احلي صورة بإنبهار
والله لو املك سلاح .....
لاضربلها .. مليون عيار..
بعنيه شفت صبايا مصر .. بيزوقوها ف الميدان
وبيمسحوا باديهم الناعمين ..دموعها
اللي سالت ليل نهار
كل اللي راهن يوم عليها ..فوق ترابيزة قمار
خسر الرهان ..
كل اللي كان شابك ..ف ديل المذبلة
بان الجبان ...
الفرحة فوق عقل البشر...
اللي اترمي فوق حجرة ياما كلام كتير...
ومافهش كلمة ( ( اختيار ))
عارفين بلدنا حلوة كيف ...
لكن يا هووو
كان الحلا مسروق ..ومتساب المرار
بس اللي حازز جوا قلبي حبتين
شامم روايح من مطالب مش تمام
فاقدة لطعم الانسجام
خلوا بالكم
مصر شاهدة
اهي قبالكم
واوعوا نفلت للزمام ...
واوعوا تفلت حلقة منا
او يفرق حد بينا
مصر فوقنا
فوق جبينا
مش فصايل ...او شلل
او شعللة نار الخصام
مصر بتساع الجميع
حطوا القواعد والاسس
مع احترامي للمشايخ .. والقسس
الاساس هوا الاساس
والفرعي يستني .. مايبقاش المقاس
كل واحد راح يجيله حقة ويخبط عليه
بالعدالة جنبها الحرية والمدنية
عمدان الاساس .........................
واللي مايشوفشي امتداده ..
ده اكيد يبقي اتعمي ....
والله يا مصر عمار .. عمار
مسروقه طول عمرك ..
ويوم منك .. ماينقطع الخضار ....
والقطة والكلب اللي ضالين ف الشوارع
ما يباتوش من غير عشا ..
يا مصر قومي اتكحلي .. واتزوقي ...
واترسمي فوق كل البلاد .....
ياه ع السنين ...
حبة ولاد..
يفرحوا القلب الحزين
بيموتوا لجل ما تكوني الاميرة ..
اضفري . واتبغددي.. وريني مقدار الضفيرة ....
شوفتي ... سيف الله وسالي ؟؟
شوفتي اسلام ويا احمد ؟؟
مينا .. جرجس ..والا مريم ..
مصطفي وابانوب.. محمد .. ويا غيرهم ...
شوفتي وائل ...
بدر طالع م السجون ..
لجل يقول الثورة مالهوش فضل فيها ....
واتفطر ساعة ما شاف تصاوير خواته م العياط
اللي طلعوا عشان يموتوا
ف الميدان مستشهدين ..
الواد أمين ...
ذي كل ولاد بلدنا الطيبين
اه يا بوي ع الولد دول
متعلموش الكذب كيف ف المكرفون
وازاي تكون .. وانت لا شئ ولا يحزنون ..
متعلموش الغش فوق ساحة القمار..
ولا يعرفوش الا العمار ...
ماباعوش بلادهم .. او عليهم يوم تهون ..
الخلق كله ف كل عالم
شاف ولادك ...
اللي ليهم .. يامه كل الاحترام
واللي ليهم .. فضل حق الاختراع...
ثورة طالعة بالغنا .. وب لابتسام
وبيعزفوا ...
وبيرسموكي ف احلي صورة باكتمال ...
طاهرة في غاية الجمال
ياه ع العيال ..
لأ .. ويقولوا ...
مصر قال
عايزة .. ولد ؟؟؟؟؟؟
-------------------------------------
الخميس مايو 24, 2012 12:58 pm
